Barnalán er hugmynd sem kviknaði þegar við vinkonurnar vorum saman í fæðingarorlofi að steikja kleinur!
Við vorum það lánsamar að eignast börn með aðeins sex mánaða millibili og þar að auki erum við nágrannar.
Við höfðum lengi átt okkur draum um að vinna saman og skapa eitthvað nýtt. Margar hugmyndir höfðu kviknað í gegnum árin og margir grámyglulegir mánudagar verið notaðir til að láta okkur dagdreyma. Hugmyndirnar höfðu þó aldrei orðið að neinu meiru fyrr en núna.

Yfir kleinubakstrinum fórum við að ræða um magnið af hlutum sem við hefðum þurft að kaupa eða fá lánaða eftir að börnin okkar fæddust, hluti sem væru aðeins notaðir í stutta stund. Okkur er báðum annt um umhverfið og mikið í mun að reyna að endurnýta og sporna gegn sóun. Geymslurnar okkar voru yfirfullir af dóti sem við vorum hættar að nota en á sama tíma fannst okkur erfitt og tímafrekt að reyna að selja hlutina. Þá ræddum við um hversu þægilegt það væri að geta leigt þessar vörur. Út frá þessum samræðum kviknaði hugmyndin um Barnalán.